UV vs. SWU sa cesafi finals

CEBU, Philippines - Gitangtangan sa Southwestern University (SWU) Cobras ug korona ang defending champion University of Cebu (UC) Webmasters pinaagi sa pag-iskor og pungtanon nga 70-56 nga kadaugan kagabii ug nakabawos sa miaging tuig nilang kapildehan aron mo-abanta sa finals sa nagpadayong 12th season sa Cebu Schools Athletic Foundation, Inc. (CESAFI) didto sa Cebu Coliseum.

 Ning pagsuwat sa alas 7:30 sa gabii, nagkumbate pa ang Lancers ug ang University of San Jose Recoletos (USJR) Jaguars diin tinguha sa Lancers nga mokulit og 3-0 sweep aron sundan ang ilang 6-0 sweep sa elimiantion round sa usa ka non-bearing match.

 Nakaginhawa'g lawon ug malipayon kaayo ang mga dumadapig sa UV tungod kay nasalbar ang Baby Lancers tungod sa mas taas nga quotient aron mo-abante sa finals sa juniors division bisan pa ug giusban sila'g pilde sa topseed Sacred Heart School-Ateneo de Cebu (SHS-AdC) Magis Eagles, 96-81.

Bisan pa sa maong kapildehan diin nakamugna kini'g triple tie sa 1-2 nga baraha tali sa Cebu Eastern College (CEC) Dragons ug sa Cebu Institute of Technology-University (CIT-U) Baby Wildcats. Midaug ang Dragons batok sa Baby Wildcats sa iskor, 83-78.

Ang UV juniors maoy nakakuha'g highest quotient nga 1.088 gisundan sa CIT-U nga may 0.981 ug ang Dragons may 0.939.

Kung kahihumdoman, gitagak sa Cobras ang Lancers sa semiifnals sa miaging tuig sa usa ka duwa nga miresulta og kagubot. Kataposan   silang nagbagat sa finals niadto pang 1996 dihang ang CESAFI giila pa nga CAAA diin nag-away sab silang Gabriel Maloloy-on sa UV ubos ni coach Jerry Aratan batok ni Roy Vistal sa SWU nga kanhi ubos ni coach Dodie Miego.

Na-outscore sa Cobras ang Webmasters, 13-0 gikan sa uwahing bahin sa third ug pagsulod na sa fourth period aron moposte'g 18 puntos nga abante. Human sa triple ni Kido Cabrera sa UC, didto makasikit ang Webmasters, 40-45 apan wala mahingpit ang ilang rally tungod kay mibalik og burot ang labaw sa Cobras nga miabot na og 19 puntos sa duha ka higayon.

Gisugat ni Joseph Nalos ang fourth period og sagunson duha ka tres ug gitiwasan pa gyud kini ni Justin Aboude sa iyang duha ka three-point play. Laing nakapahasol sa depensa sa UC mao ang pagbalik sa SWU shooter nga si Bonifacio Guillena III kinsa miamot og 12 puntos gikan sa iyang pagbalik sa duwa human siya mapiang niadtong Hulyo dihang napilde ang Cobras sa Jaguars, 72-80.

   Ang Cobras mitapos sa semifinals sa 2-1 nga baraha.

Si Cabrera mibahug og 17 puntos aron pangulohan ang Webmasters samtang si Quinton Brian Heruela midugang og 15 puntos. Igo na lang silang makigsangka batok sa Jaguar alang sa ikatulong pwesto human sila nahimong kampiyon sa 2010 ug 2011 ubos sa ilang higante ang 6-9 nga si June Mar Fajardo kinsa maoy no. 1 rookie sa PBA draft sa Petron Blaze Boosters.

Puntos matag usa: 

 SWU (Coll.) 70—Nalos 15, Aboude 12, Guillena 12, Bregondo 8, Mbala 7, Casquejo 7, Arong 4, Ortuyo 3, Dedace 1, Goloran 1

UC (Coll.) 56—Cabrera 17, Hereula 15, Wagas 7, Gomez 6, Mohammad 3, Cueva 3,Sealana 3, Quilantang 2. Halftime: 37-23.