Magis Eagles tugpa finals, baby lancers buhi pa

CEBU, Philippines - Gikuninitan og maayo sa topseed Sacred Heart School-Ateneo de Cebu (SHS-AdC) Magis Eagles ang Cebu Institute of Technology-University (CIT-U) Wildkittens, 70-49 aron motugpa sa ikatulong higayon sa finals sa 12th Cebu Schools Athletic Foundation Inc. (CESAFI) basketball event kagahapon didto sa Cebu Coliseum.

Sa sayo pa, buhi gihapon ang kampanya sa defending champion University of the Visayas (UV) Baby Lancers dihang ilang gipalagpot ang kanhi kampiyon Cebu Eastern College (CEC) Dragons pinaagi sab sa paglubong sa iskor nga 71-54.

Gipamatud-an sa gamitoy'ng guwardiya nga si Arc Gabriel Araw-araw nga dili lang gitas-on maoy saligan sa duwang basketbol tungod kay siya man ang nagtugpo sa Magis Eagles ngadto sa kadaugan pinaagi sa iyang 21 puntos. Wala kaayo mowadwad og maayo ang power forward nga si Henric Dawn Ochea ug igo lang siyang mitusak og sayes puntos.

Ang Wildkittens gipangulohan sab sa ilang torotoy'ng pointguard nga si Jonher Espina, kinsa misungkab og 12 puntos, apan wala kahuygo si Carl Anthony Patindol, kinsa miiskor lang og kuwatro puntos.

Grabeng depensa ang gipatuman sa Magis Eagles ug ila lang nga gipaiskor ang Wildkittens og 14 puntos sud sa duha ka kuwarter. Siyete puntos sa first period ug laing siyete sa second period.

Sa laing bahin, si reigning   MVP Andres Paul Desiderio mibahog og 27 puntos aron tabangan ang Baby Lancers nga magpabiling buhi sa ilang kampanya pagdepensa sa korona.

Si Jun Kent Manzo III miamot og 13 puntos.

Silang Dominic Yap ug Mark Vincent Berdera maoy nangu sa napildeng Dragons nga nagkumboya og 25 puntos.

Puntos Matag Usa

Unang duwa:

UV (71) - Desiderio 27, Manzo 13, Dinolan 9, Santillan 6, Fernandez 5, Escalona 4, Dela Cerna 4, Limitares 2, Bercero 2

CEC (54) - Yap 13, Berdera 12, Grijaldo 9, Bayhonan 6, Balankig 5, Mangyao 4, Bracero 2, Moral 2, Zosa 2, Bacho 2

Ikaduhang duwa:

SHS-AdC (70) - Araw-araw 21, Cercado 11, Jaboneta 8, Igna 8, Ochea 6, Galvez 6, Laguyo 4, Ecarma 2, Competente 2, Padilla 2

CIT-U (49) - Espina 12, Singson 9, Kong 8, Jabines 5, Patindol 4, Abatayo 3, Laguna 2, Ebona 2, Aloro 2, Nebril 2 (BANAT SPORTS)