CEBU, Philippines - Iladlad ni ALA world title contender Milan 'El Metodico' Melindo ang tipaka sa bunga sa kapin duha ka buwan niyang ensayo sa pagahimuon nilang public work-out karong hapon didto sa SM City-Consolacion.
Ipamatuod ni Melindo nga naabot na niya ang siyento porsyentong kondisyon paingon sa iyang sangka.
Si Melindo, 24-anyos sa Cagayan de Oro City modepensa sa labing unang higayon sa iyang WBA International flyweight title batok ni Jean Piero Perez sa main event sa "Pinoy Pride XVI: Venezuelan Invasion" sa Septiyembre 22 diha sa Waterfront Cebu City Hotel and Casino.
Uban ni Melindo sa public workout mao sila si OPBF champion Rocky 'Road Warrior' Fuentes ug ALA rising star Arthur Villanueva.
Si Fuentes makigsangka ni Myung Ho Lee sa Japan, samtang si Villanueva mosukod sa abilidad ni kanhi two-time world title challenger Pramuansak Posuwan.
Gawas nga makakita sa ilang idolo, ang mga boxing fans may kahigayonan usab nga makadaog og libreng tiket sa away sa ipahigayong trivia contest human sa public-workout. (BANAT SPORTS)