Baby Lancers disgrasya sa Wildkittens

CEBU, Philippines - Gagmay, apan makapuling. Mao ni ang  tukmang pulong nga ikahulagway alang sa Cebu Institute of Technology-University (CIT-U) Wildkittens dihang ilang gipakuratan ang defending champion University of the Visayas (UV) Baby Lancers sa overtime, 79-77.

Nabiyaan og singko puntos ang UV Baby Lancers, 74-79, apan nakasikit kini human sa three-pointer ni Andres Paul Desiderio sa iskor nga 77-79.

Makalikay unta sa overtime ang CIT-U Wildkittens kun wala pa mokagar ang usa sa duha ka free throws ni Mark Kong. Apan usa lang ang iyang napasulod hinungdan nga igo lang natabla ang iskor, 67-all sa nahabiling 1:07 sa duwa.

May lain pa untang higayon nga modaog sab sila sa regulasyon, apan hinay kaayo ang assists ni Mark Vincent Laguna hinungdan wala kini makuha ug naabtan sa paghuni sa final buzzer aron molanat ang duwa sa overtime.

Depensa ngadto kang Desiderio ang nakapaguba sa opensa sa UV Baby Lancers, apan bisan pa niana, nakahimo gihapon siya pag-iskor og 35 puntos.

Si Carl Anthony Patindol, mibahog og 24 puntos aron pangulohan ang CIT-U Wildkittens, samtang ang torotoy'ng pointguard nga si Laguna mihungit og 15 puntos.

Ang CIT-U Wildkittens mao kanunay ang naglabaw sa duwa ug milabaw og 10 puntos, 45-35 sa uwahing bahin sa third period sa wala pa mogukod ang UV Baby Lancers ug miposte’g 60-57 nga labaw human sa basket ni Ernesto Limatares sa nahabiling 6:34 ang oras sa fourth period.

Gikan niadto, nagbanos-banos na og labaw ang duha ka kampo hangtod nga milanat gyud ang duwa ngadto sa overtime. (BANAT NEWS)