CEBU, Philippines - Gikatakdang moabot karong adlawa dinhi sa Sugbu si kanhi Venezuelan world interim champion Jean Piero Perez nga maoy ikasangka ni ALA Boxing Gym superstar Milan Melindo.
Suwayan ni Perez ang pag-ilog sa WBA International flyweight title nga gihuptan karon ni Melindo sa main event sa "Pinoy Pride XVI: Venezuelan Invasion" Septiyembre 22 diha sa Waterfront Cebu City Hotel and Casino.
Ang Venezuelan boxer uban sa iyang trainer nga si Francisco Arroyo ug Lucio Lam Mejia moabot karong gabii diha sa Mactan Cebu International Airport (NAIA).
Ang Team Perez mohimo og mga public work-out ug press conference uban sa Cebu sports media.
Bisa'g wala pa makita ni Perez sa personal si Melindo, ang bisitang boksidor mipadangat dayon og ngil-ad nga mensahe ngadto sa garbo ALA Gym.
Matud pa ni Perez nga wala siya mahadlok nga moaway sa balwarte sa iyang kontra ug napamatud-an na ang iyang abilidad dihang misulong siya didto sa Mexico ug mipilde sa Mehikanong si Jesus Jimenez aron langkaton ang WBA interim title sa miaging tuig. (BANAT NEWS)