Gilas, China magkakasubukan ngayon

TOKYO--Sisimulan ng Smart Gilas Pilipinas 2.0 ang kanilang kampanya sa 4th FIBA Asia Cup ngayon laban sa isang Chinese squad na gustong maka­bawi sa malamya nilang pagpapakita sa nakaraang 2012 Olympic Games.

Binago ng China ang kanilang national team ma­tapos masibak sa London Games, at ang bagong Chinese squad ay sabik nang magpakita sa torneo.

 “We’ve heard they’re playing their Team B or their new team. But in my experience, they’re always very competitive even with their Team B,” sabi ni Gilas coach Chot Reyes.

“It is what it is. It’s a good preparation for us,” dagdag pa ni Reyes, haharapin ang mga Chinese sa kanilang ikalawang international tourney matapos ang 34th Jones Cup.

Magtatagpo ang mga Filipino at Chinese nga­yong alas-4:30 ng hapon sa Ota City Gymnasium.

Lalabanan naman ng Le­banon ang Macau sa isa pang laro sa Group A sa alas-11:30 ng tanghali, habang sa Group B magtatapat ang Iran at India sa alas-2 ng hapon at ang host team kontra sa Qatar sa alas-7 ng gabi.

Sinandigan ng China sina NBA players Yi Jianlian at Wang Zhizhi sa 75-60 paggupo sa Nationals sa kanilang huling pagkikita sa preliminary round ng 2011 FIBA Asian Cham­pionship sa Wuhan, China.

Ang hindi paglalaro nina Marcio Lassiter at Chris Lutz bunga ng eligibility is­sue ang nakaapekto sa laro ng Gilas.

Pinagharian ng mga Chi­nese ang Wuhan meet at dinala ang parehong champion team sa London Games kung saan naman sila pinayukod ng Russia, Brazil, Spain, Australia at Great Britain.

Sa pagbabagong-bihis ng China, ipaparada nila sina youth stars Wang Zhelin at Guo Ailun.