CEBU, Philippines - Agi'g pagpangandam alang sa pormal nga pagbukas sa labing unang liga sa Lapu-Lapu Sports Club, ang 12 ka koponan nga sakop sa LLSC mopahigayon og tune-up games sa Septiyembre 10 ug 12 didto sa Crown Regency gym sa Lapu-Lapu City.
"Amo gituyo nga mag tune-up mi aron mag-ilhanay ug masinati sa players ang tagsa-tagsa nila ka abilidad," matud pa ni league organizer Billy Nadado.
Unang magsangka sa alas-7 sa gabii mao ang Rulls Cellphone Accessories ni Rupert Canizar nga mosukod sa abilidad sa Rollway Customs Brokerage ni Rolly de la Pieza.
Sundan kini sa engkuwentro tali sa JB Aquatic ni Neil Belga ug sa RoRo Transport ni Roilan Sumilang sa alas-8 sa gabii ug ang Lheo Autoshop/Jonmar ni Leo Almacen ug Marlo Llenes ug Reys Videoke ni Rey Toledo maoy magtigi sa katapusang duwa sa alas-9 sa gabii.
Sa Septiyembre 12 (adlaw'ng Miyerkules), ang Aries Lending ni Tito Francisco makigsangka batok sa VKK Divers ni Victor Malingin sa pasiunang duwa sa alas-7 sa gabii. Magsangka sa ikaduhang duwa sa alas-8 sa gabii mao ang Verlex-Lapulapu Electronics ni Alex Dignos ug Orya Farms ni Roger Ompad, sundan sa sangka tali sa AJY Bong ni Alan Yu ug Ball Holics ni Noli Paquibot.
Ang labing unang Lapu-Lapu Sports Club basketball tournament nga sugdan sa Septiyembre 23 didto gihapon sa Crown Regency gym, gipahaom alang sa tinuig nga kasaulogan sa kapistahan sa Birhen sa Regla sa Nobiyembre 21-22, 2012. (BANAT NEWS)