CEBU, Philippines - Nangangkon si IBF International featherweight champion Rey 'Boom Boom' Bautista (33-2, 25KOs) nga mas kuyaw siya karon nga boksidor ug andam na sa iyang tinguha nga makakuha og laing world title shot.
Apan aron mahimo kini, si Bautista kinahanglan una motubag sa hagit ni Mexican brawler Daniel 'Cañerito' Ruiz (27-5,19KOs) sa ilang sangka sa undercard sa "Pinoy Pride XVII" nga bidahan usab ni AJ 'Bazooka' Banal.
Si Banal mosuway pagsakmit sa WBO bantamweight title batok ni Thai Pungluang Sor Singyu sa Oktubre 20 didto sa SM Mall of Asia Arena sa Pasay City.
Sila si Bautista ug Ruiz mag-ilog sa bakanteng WBO International featherweight title.
Ang garbo sa Candijay, Bohol nagpanikad na nga mobalik og saka sa ring human sa iyang kontrobersiyal nga second round TKO victory batok ni Genaro 'Panterita' Garcia niadtong Marso 3 didto sa Tagbilaran City.
Bisan pa'g nidaog, daw gusto kalimtan ni Bautista ang maong hitabo tungod kay inay usa ka kanhi world title challenger ang iyang sangkaon, usa ka "peke" nga Genaro Garcia ang iyang gikasangka nga miani og pagsaway gikan sa mga boxing fans.
"Excited nako mobalik sa ring kay sa akong katapusan nga away wala man ko kapakita sa akong abilidad ug kontra ni Ruiz, mao na ni akong chance aron makahimo og impresibong away," matud pa sa ALA Boxing Gym fighter. "Wala ko'y hunong sa akong training ug makaingon ko nga mas kuyaw nga Boom Boom ang ilang makita."
Nagkanayon si Bautista nga andam siya nga makigsangka ni WBO champion Orlando Salido sa Mexico kun motugot ang kahigayonan.
Interesado usab siyang moharong ni kanhi Puerto Rican champion Juan Manuel Lopez o makig-rematch ni Mexican Daniel Ponce De Leon nga maoy unang nakapilde kaniya.
"Nagkugi ko sa training aron ipakita nga gutom gihapon ko para sa world title ug maayo unta nga tagaan ko og chance sa mga boxing fans aron mapakita nako nga anaa gihapon nako ang abilidad ma-champion." (BANAT NEWS)