UV lancers mipukan sa VMO all-star

 CEBU, Philippines - Maayong preparasyon alang sa semifinals ang gipakita sa powerhouse University of the Visayas (UV) Green Lancers dihang ilang gibuntog ang VMO All-Star nga gilangkuban sa mga PBA/ABL players sa iskor, 70-58 kaniadtong Domingo didto sa UV Gym.

Ang maong exhibition game gihimo isip usa ka tune-up alang sa Lancers sa ilang pagpangandam sa umaabot nga Cebu Schools Athletic Foundation, Inc. (CESAFI) semifinals diin sila maoy no. 1 qualifier human ilang giharus ang elimination sa 6-0 nga baraha.

Daan nang naglabaw ang Lancers, 38-24 sa halftime ug wala kini nila lugaki didto sa second half.

Nagpakita sab sa ilang katakos batok sa mas dagkong PBA/ABL stars silang 6'7 Nigerian Steve Cedrick Akomo ug Wowie Escocio aron pagtimon sa ilang team.

Usa ka alley-oop dunk ang gihimo ni Akomo gikan sa assist ni Luther Huevos sa second period nga maoy nakapahugyaw sa mga UV fans. Iya sab gitirahan sa atubangan ang kanhi PBA star nga si Mark Andaya alang sa 33-24 nga abante sa wala pa motira og three-pointer si Huevos.

Mi-arte sab silang Eman Calo, Phil Mercader, Jerome Silva ug Rene Jun Saycon sa first half ug misalida sad silang Cris Perolino, Vincent Mendoza, Rhaffy Octobre ug John Michael Abad.

Unya pa sa Septiyembre 11 mobalik og duwa sa CESAFI ang Lancers batok sa no. 4 seed. Mobalik na sab sa single round robin sa semifinals ang upat ka teams diin mobalik na sa zero ang team standings.