Pondoyo, Derotas nanghawod

CEBU, Philippines - Ang pambato sa University of Cebu (UC) nga si Cristian Klent Pondoyo ug Glysen Derotas sa University of San Carlos (USC) maoy midominar sa tagsa-tagsa nila ka dibisyon sa 2012 National Youth Active Chess Championship-Visayas leg sa miaging adlaw didto sa SM City-Cebu Event Center.

Si Pondoyo mikolekta og otso puntos sa nine round Swiss system tournament, aron mapilde si Tristan Frech Ibaoc alang sa korona sa boys kiddie division, samtang si John Balbona mao ang misakmit sa ikatulong dapit.

Sa iyang bahin, gipakita usab ni Derotas ang iyang abilidad sa girls 14-under category batok nila ni Biazza Diaz ug Nicole Flores pinaagi sa usa ka seven-game sweep sa torneyo nga gipasiugdahan sa Pilipinas Shell ubos sa bendisyon sa National Chess Federation of the Philippines.

Sila si Pondoyo ug Derotas maoy morepresentar sa Visayas alang sa national finals nga gitakda sa Septiyembre 22-23 didto sa SM Megamall sa Ortigas.   - BANAT NEWS