Nietes gitawag nga talawan

CEBU, Philippines - Nagpasingit ang Nicaraguan champion nga si Roman "Chocolatito" Gonzalez ngadto ni ALA boxing champion Donnie Nietes kinsa iyang gitawag nga talawan ug gihagit niya alang sa usa ka unification bout.

Si Gonzales kinsa maoy nagkupot sa WBA light flyweight title nagkanayon nga dugay na siyang gustong makigsangka ni Nietes kinsa mao usab ang nanag-iya sa WBO title.

"I wanted to face Nietes but he was afraid. My attorneys told me they would not take the fight and that's cowardice, because months ago I made a public challenge and when he gets the opportunity to fight - he ran," matud pa ni Gonzales.

Si Gonzales miingon nga gusto niya nga sangkaon si Nietes sa undercard sa September 29 fight nila ni Brian Viloria ug Tyson Marquez didto sa Home Depot Center.

Gipasanginlan ni Gonzales ang kampo ni Nietes kinsa maoy iyang gibasul sa wala pagkahinayon sa iyang gusto nga away. Gikataho nga si Gonzales makigsangka ni Felipe Salguero sa maong petsa.

Si Salguero maoy katapusang boksidor nga gipilde ni Nietes niadtong Hunyo 2 didto sa Resorts World Manila.