Melindo vs. Venezuelan

CEBU, Philippines - Ang undefeated ALA Boxing Gym star nga si Milan ‘El Metodico’ Melindo moatubang na usab og laing hagit sa dili pa ang iyang damgo nga world title shot sunod tuig.

Ang 24-anyos nga si Melindo kinsa ranked No.1 sa WBO, No.6 sa WBC ug No.7 sa WBA, gitakdang makigsangka sa Venezuelan nga si Jean Piero Perez sa main event sa ‘Pinoy Pride XVI:Venezuelan Invasion’ karong Septiyembre 22 didto sa Waterfront Cebu City Hotel and Casino sa Brgy.Apas, ning syudad.

Si Melindo kinsa adunay perpektong record nga 27 ka daog, 11 niini gikan sa knockout, modepensa sa iyang WBO International flyweight championship batok ni Perez kinsa adunay record nga 19-4, 14KOs.

Iyang gisakmit ang bakus niadtong Hunyo 2 didto sa Resorts World Manila dihang iyang gitumba sa round one ang kanhi world champion nga si Jesus Geles.

 “Milan will surely fight for the title next year,” matud pa ni ALA Promotions President Michael Aldeguer sa press conference kagahapon didto sa Cebu Grand Hotel. “We are targeting either against (Brian) Viloria or (Hernan) Marquez who will also be fighting next month in a title unification bout.”

Si Melindo giisip nga mandatory challenger alang sa WBO title ni Viloria diin gilauman unta ang ilang sangka karong tuiga, apan nausab ang plano dihang mas gipalabi ni Viloria nga makigharong ni WBA title-holder Marquez sa usa ka unification sa Septiyembre 29 didto sa California.

“No question Milan is ready for a world title fight but we will still have to wait for the result of the Viloria-Marquez fight,” dugang pa ni Aldeguer.

Hinuon sa dili pa kini, si Melindo moseguro una nga mapilde niya si Perez kinsa giisip nga usa ka lisud nga kontra alang sa ALA boxer. Ang kanhi WBA interim champion nga si Perez gikan usab sa usa ka eight round knockout nga kadaugan batok ni Colombian Michael Arango niadtong Abril 26 sa Panama.

Gawas ni Melindo, laing highly-ranked flyweight sa ALA Gym nga si Rocky ‘Road Warrior’ Fuentes (33-6, 22KOs) ang moaway sa supporting event batok ni Japanese based-South Korean boxer Myung-Ho Lee (15-1, 5KOs).

Kini ang ikalimang title defense ni Fuentes sa iyang Oriental and Pacific Boxing Federation (OPBF) belt nga iyang nadag-an niadtong Marso sa miaging tuig batok ni Japanese boxer Masafumi Okubo.  - BANAT NEWS