CEBU, Philippines - Nakasugakod ang Smart Gilas Pilipinas sa hagit sa usa sa Asian powerhouse South Korea-Anyang KGC human kini nila gipilde, 82-79 sa 34th William Jones Cup kagahapon didto sa TPEC Gymnasium sa Taiwan.
Human mokulit og duha ka sunod-sunod nga daog batok sa Jordan ug Chinese-Taipei, gipakita sa nasudnong koponan ang ilang katakus sa depensa nga maoy nahimong yawi sa ilang kadaugan batok sa South Korea .
Sa maong kadaugan, naputol sa Smart Gilas ang sunod-sunod nilang kapildihan batok sa South Korea nga katapusang mipilde kanila atol sa ilang duwa alang sa ikatulong dapit sa FIBA Asia Championship sa miaging tuig didto sa China .
Sa kasamtangan, ang Pilipinas nagbitbit karon og 3-0 win-loss record nga mibutang kanila sa top seed uban sa defending champion Iran ug USA Selection.
Ang Jones Cup maoy labing unang international tournament nga salmotan sa Pilipinas agi’g pangandam alang sa 2012 FIBA Asia Championships sa Oktubre didto sa Lebanon .
Naglabaw og 12 puntos ang South Korea sa 3:45 sa third period, 61-49, apan pagsulod sa final period gikalingawan og kitkit sa Pilipinas ang labaw ug miabot na lang og uno punto, 74-75, human sa lay-up ni Sol Mercado.
Gikan didto nakuha sa Pilipinas ang momentum dungan usab sa sunod-sunod nga turnovers sa mga South Korea. Ang back-to-back jumper ni Gary David maoy mikandado sa daog sa Smart Gilas nga moharong sa Japan karong adlawa. (BANAT)