National sluggers tutulungan ni Belmonte

MANILA, Philippines - Tutulong si House Spea­ker Feliciano “Sonny” Belmonte sa paghahanda ng Philippine baseball team na lalaban sa East Asia Baseball Cup sa Bangkok, Thailand sa susunod na buwan.

Lumiham ang Philippine Amateur Baseball As­sociation (PABA) sa tanggapan ni Speaker Belmonte para umamot ng kaunting tulong at nagpaunlak naman ang dating Alkalde ng Quezon City sa pagbibigay ng P50,000.

Ang perang ito ay gagamitin ng PABA upang ipambili ng mga uniporme ng national sluggers na nagha­handa rin para sa paglahok sa World Baseball Classic qualifiers sa Chinese Taipei mula Nobyembre 15 hanggang 18.

“Nagpapasalamat ka­mi sa pagtulong na ito ni Speaker Belmonte na kahit noong Mayor pa lamang ng Quezon City ay kilala na sumusuporta sa mga sports program. Sana ay marami pang politiko ang tumulong sa sport para magpatuloy ang pag-unlad ng palakasan sa bansa,” wika ni PABA head Hector Navasero.

Nakatulong din sa pag-amot ng tulong ng PABA sa butihing Speaker ang pagiging magkaibigan nina Navasero at Belmonte na parehong kasapi ng Philippine Jaycees.

Ang torneo sa Bangkok ay itinakda mula Setyembre 17 hanggang 24 at ina­asahang lalahukan din ng Malaysia, Myanmar, Hong Kong at Vietnam.

Magsisilbi itong quali­fying tournament para sa Asian Baseball Championship na lalaruin sa Chinese Taipei mula Nobyembre 28 hanggang Disyembre 2.

Ang baseball ay hindi gaanong nakakakuha ng suporta sa PSC.