Magis Eagles mibihag sa Dragons

CEBU, Philippines - Nabihag sa Sacred Heart School-Ateneo de Cebu (SHS-AdC) Magis Eagles ang Cebu Eastern College (CEC) Dragons, 71-61 alang sa ilang ikaduhang daog sa 12th Cebu Schools Athletic Foundation Inc. (CESAFI) basketball event kagabii didto sa Cebu Coliseum.

Kanunay nga naglabaw ang Magis Eagles ug igo lang nilang gipatilaw og labaw ang Dragons sa makadiyot sa second quarter, 28-25 sa wala pa nila mabawi sa halftime, 34-30.

Si Dawn Henric Ochea nagmangtas sa ilawom atol sa fourth period aron pangulohan ang Magis Eagles pinaagi sa iyang 12 puntos.

Ang beteranong si Michael Lorenzo Balangkig mao usab ang nangu sa Dragons nga mibugwak og 15 puntos, samtang duha ka teammates mitikdol og otso puntos matag usa.

Ning pagsuwat, padayon pang nagkumbati ang Southwestern University (SWU) Cobras ug ang University of Southern Philippines Foundation (USPF) Panthers.   - BANAT NEWS