CEBU, Philippines - Dul-an sa 100 ka riders gikan sa nagkadaiyang bahin sa nasud ang mosalmot sa 1st Mayor Michael Rama Invitational Motocross Cup karong Domingo diha sa South Road Properties (SRP).
Ang lumba ipahigayon unta atol sa Cebufest, apan wala mahinayon ang maong multi-sports event tungod sa mga kakulian.
Ning higayona, pinaagi sa PowerSports Promotions ni Jonas Adlawan uban sa suporta sa Kopiko ug Cebu City Government, mahinayon na gyud ang usa sa labing dakung motocross race sa Sugbu ning tuiga.
Ang mga kategoriya nga tigian naglakip sa beginners, mini, open production, executive, veterans, pro open ug pro expert ug 'habal-habal' division.
Mga dekalibreng riders sa Luzon ug Vis-Min region naglakip nila ni Kenneth San Andres, Dondon Yuson, Jovie Saulog ug Buboy Fernandez sa Team Pacquiao.
Samtang manalipod sa ilang balwarte si rising teen sensation Jon Eleazar 'Jon-Jon' Adlawan, Pepo Rubi ug managsuong Abellar nga sila si Jovannie and Juvenil.
Ganting salapi ug tropeyo ang madawat sa mga mananaog sa matag kategoriya. - BANAT NEWS