Dynamic Power nagmangtas na sab sa SHAABAA cagefest

CEBU, Philippines - Nagmangtas na sab ang defending champion Dynamic Power diin ilang gilubong ang Twin Tower Farms Gold, 92-70, samtang ang JAPFA midemolis sab sa A Team, 74-53 sa 17th Sacred Heart-Ateneo Alumni Basketball Athletic Association (SHAABAA) season niadtong Domingo didto sa SHS-Ateneo de Cebu gym sa Brgy. Canduman, Mandaue City.

Ang Gold Berry Suites, Cebu Landmasters ug Insular Square nimasaker sab sa ilang tagsa-tagsa ka kaatbang.

Ang Gold Berry Suites maoy nakaangkon sa labing dakung biya sa kasamtangan human ilang gikuso-kuso ang Gaisano Capital   aron moiskor og 75-49 nga kadaugan.

Sa laing bahin, ang Landmasters mirehistro sa ilang ikaduhang sunod-sunod nga daog pinaagi sa paglubong sa RDAK sa iskor nga 58-41, samtang ang Insular Square milubong sa Fiesta Cebuana sa iskor nga 57-40.

Si Ed Macasling miiskor og 17 puntos ug si Kylee Valmoria midugang og 13 puntos aron pangulohan ang JAPFA, samtang si Ryan Lauro nga miposte og 20 puntos mao sab ang nangulo sa A Team.

 Sa laing bahin, gipangulohan ni Jeremy Huang ang Goldberry Suites pinaagi sa iyang 14 puntos, gisundan ni Eugene Tan sa iyang 10 puntos. (BANAT NEWS)