2-0, tuyo sa uv green lancers

CEBU, Philippines - Tinguha sa University of the Visayas (UV) Green Lancers nga mokulit sa ilang ikaduhang sunod-sunod nga daog sa pakigsangka nila sa Cebu Institute of Technology-University (CIT-U) Wildcats sa 12th Cebu Schools Athletic Foundation Inc. (CESAFI) basketball event karong gabii diha sa Cebu Coliseum.

Sa higayon nga modaog ang Lancers, saw-an nila ang liderato uban sa University of San Jose-Recoletos (USJ-R) Jaguars sa managsama nilang 2-0 win-loss records.

Sa pasiunang duwa sa alas-5 sa hapon, ang UV Baby Lancers laraw sab sa ikaduha nilang daog sa dihang ilang sangkaon ang University of Southern Philippines Foundation (USPF) Baby Panthers.

Kun upset ang hisgutan, nahitabo kini niadtong Domingo dihang ang University of San Carlos (USC) Warriors ubos sa ilang bag-ong coach nga si Julian Macoy mi-rally sa fourth period aron paludhon ang defending champion University of Cebu (UC) Webmasters, 86-79.

Si June Michael Cantonao ug ang Taiwanese-American nga si Stephen Que mipasulod og krusyal kaayong three-pointer nga maoy nagduslit sa rally sa Warriors. Si Nico Magat miposa sab og laing triple dihang ang Warriors miinat sa ilang labaw ngadto na sa otso puntos, 75-67 sa nahabiling 3:30 sa duwa.

 Ang mga free throws nilang Carl Valencia ug Nilton John Otida sa nagkaupos nga oras maoy nagselyado sa kadaugan sa Warriors, kinsa naghupot karon og 1-1 nga baraha.

Ang sentro nga si Charles Pepito nga mipakita og maayong mga labok sa ilawom maoy nangulo sa Warriors sa iyang 15 puntos. Sila si Cantonao ug Maga miiskor og 14 matag usa, samtang sila si Otida ug Que nagkumboya og 10 puntos.

 Ang higanteng guwardiya sa UC nga si Quinton Brian Heruela mirehistro og season-high 26 puntos, apan ang iyang mga paningkamot nakawang lang.

Si Kim Gomez miposa og 13 puntos, samtang sila si Gil Wagas ug rookie guard Bennick Sealana miburak og 11 puntos matag usa alang sa UC.

Sa secondary matches niadtong Domingo, ang UV Baby Lancers mibuntog sa USC Baby Warriors, 79-74, ang USJ-R Baby Jaguars milubong sa Don Bosco Technology Center (DBTC) Greywolves sa iskor nga 65-40, samtang ang UC Junior Webmasters naka-eskapo bitbit ang 92-90 nga kadaugan batok sa USPF Baby Panthers.   - BANAT NEWS