Athletes magmatngon

CEBU, Philippines - Gipasidan-an ni veteran sportsman Oscar 'Boying' Rodriguez Jr. ang mga atleta, kinsa nagplanong moapil sa sunod edisyon sa Ironman Philippines.

Matud pa ni Rodriguez nga   kinahanglan nga timbang-timbangon nila og maayo sa dili pa mopakanaog og desisyon kun mosalmot ba o dili sa labing kutas nga lumba.

Si Rodriguez, kinsa maoy mikumbinser ni businessman-sportsman Wilfred Uytengsu nga anhi sa Sugbu ipahigayon ang Ironman, miingon nga kinahanglan nga magmatngon ug mohimo og dobleng preparasyon ang mga atleta nga moapil sa   Ironman, ang labing daku nga lumba sa nasud.

Miluwat sa maong pamahayag si Rodriguez human usa ka triathlete nga si Ramon Igaña Jr. ang namatay atol sa Cobra Ironman 70.3 Philippines niadtong Domingo didto sa South Road Properties (SRP).

Si Igaña gidudahan nga adunay gipamati sa lawas sa wala pa siya matumba sakay sa iyang biseklita ug naparok sa gutter sa SRP habig sa Talisay City.

Ang marshal nga nakakita ni Igaña sa wala pa kini matumba mihulagway nga nag-ikis-ikis na ang dagan sa bisikleta niini.

Gidali sa pagdala si Igaña sa Chong Hua Hospital sa mga sakop sa Talisay Rescue Emergency Assistance Team (TREAM), apan patay na kini pag-abot sa tambalanan.

"It is not called Ironman for nothing. As much as possible, be more careful. Conditioning wise, dapat ready gyud. Tan-awon nimo imong lawas kun kaya ba. Dili tiaw ang Ironman," matud pa ni Rodriguez sa pakighinabi sa The Freeman, ang igsuong mantalaan sa Banat News.

Dugang ni Rodriguez nga sa dili pa moapil sa Ironman, kinahanglan una sa mga partisipante nga mosuway pagsalmot og mga mugbo nga triathlon race.   - BANAT NEWS