B-MEG humirit pa
MANILA, Philippines - Hindi pa handa ang Llamados na isuko ang serye sa Elasto Painters.
Sa likod nina two-time PBA Most Valuable Player James Yap, import Marqus Blakely at mga inspiradong laro nina Mark Barroca at Rafi Reavis, tinalo ng B-Meg ang Rain or Shine, 91-81, sa Game Five ng 2012 PBA Governors Cup Finals kagabi sa Smart Araneta Coliseum.
“Hindi na namin binibigyan ng pressure ‘yung sarili namin, basta kami enjoy lang kami sa game,” sabi ni Yap, umiskor ng 30 points kung saan 18 rito ay kanyang hinugot sa first half. “Down pa rin kami sa series, pero at least nanalo kami.”
Bumangon ang Llamados mula sa dalawang sunod na kabiguan para makadikit sa 2-3 sa kanilang best-of-seven championship series ng Elasto Painters.
Sa tatlong koponang nakabalik mula sa isang 1-3 pagkakabaon sa isang title series, tanging ang Ginebra ang nakakopo ng titulo matapos resbakan ang Shell sa 1991 First Conference Finals tampok ang winning fadeaway basket ni Rudy Distrito.
Mula sa 44-41 kalamangan sa first half, pinalaki ng B-Meg, nagkampeon sa nakaraang 2012 PBA Commissioner’s Cup, ang kanilang bentahe sa 59-51 sa 5:54 ng third period mula sa isang three-point shot ni PJ Simon patungo sa kanilang 14-point lead, 77-63, 10:12 sa fourth quarter.
Huling nakalapit ang Rain or Shine, naantala ang pagkopo sa una nilang PBA championship, sa 70-77 agwat buhat sa isang four-point play at 3-pointer ni Ryan Araña sa 9:25 ng laro.
Isang 14-7 atake ang inilunsad nina Blakely, Barroca at Yap upang muling ilayo ang Llamados sa 91-77 sa natitirang 1:40 nito.
Nauna rito, napatalasik sa laro si 6-foot-6 Beau Belga sa 4:37 ng third period matapos matanggap ang kanyang ikalawang technical foul nang bigyan ng hard foul si Blakely kung saan angat ng 59-56.
B-MEG 91 - Yap 30, Blakely 24, De Ocampo 14, Barroca 9, Simon 7, Urbiztondo 2, Villanueva 2, Reavis 2, Gaco 1.
RAIN OR SHINE 81 - Cornley 25, Chan 14, Arana 11, Cruz 8, Ibanes 6, Buenafe 5, Belga 4, Quinahan 4, Tang 2, Rodriguez 2, Norwood 0.
Quarters: 19-18, 44-41, 70-61, 91-81
- Latest
- Trending
