PICPA naka-bingo batok IBP-Gwapo

CEBU, Philippines - Unom ka three-pointers ang gituhog ni Mactan Port Collector Bingo Matugas lakip ang winning triple dihang iyang gibaswat ang Philippine Institute of Certified Public Accountants (PICPA) nga gipangulohan ni Yoly Meso kinsa mipatapsing sa IBP-Gwapo sa iskor, 92-91 kaniadtong Miyerkules atol sa pagtapos sa elimination round sa Wednesday Club basketball tournament didto sa Capitol Parish gym sa dan Escario, ning dakbayan.

Sayong naglabaw ang IBP-Gwapo, 24-21 pinaagi sa tandem nilang Bads Del Prado ug Giovani Sususco.

Dali sab hinoong mibawos ang PICPA ni coach Norwin Honoridez aron tablahon ang iskor sa halftime, 44-all dihang namuntos og maayo ang sentro nga si Ban Talaroc ug si Andre Tocao.

Nanmangtas na unta ang PICPA didto sa third period ginamit ang ilang 21-14 scoring run ubos sa pagtimon sa ilang point guard nga si Edlin Endrina uban kang Art Flores aron moposte og 65-58 nga abante nga maoy ilang kinadak-ang labaw sa maong duwa atol sa pagsugod sa fourth quarter.

Apan kalit lang nahimong sikit ang duwa sa kinatibuk-ang fourth period dihang nag-agi kini ug daghang deadlocks ug pipila sab ka lead changes ug didtong tungora misalida si Matugas aron salbaron ang iyang team ug ang iyang three-pointer sa daginutong oras maoy nagbaswat kanila.

Tungod sa maong kadaugan, mi-abante na sa quarterfinal round ang PICPA sunod semana.

Si Matugas maoy nangu sa opensa sa PICPA sa iyang 20 puntos, ang 15 niini pulos gikan sa three-point territory.

Silang Endrina og Tocao parehong mibahug ug 15 puntos matag usa ug nagkumboya silang Talaroc ug Flores ug 23 puntos.

Misakmit og 16 puntos silang Del Prado ug Milky Villamor aron pangulohan ang IBP-Gwapo samtang parehong may 12 puntos silang Mat Velez ug Giovani Sususco.

Puntos matag usa:

PICPA (92)- Matugas 20, Endrina 15, Tocao 15, Talaroc 13, Flores 10, Suelto 8, Alejandre 5, Meso 4, Gonzales 2. 

IBP (91)- Del Prado 16, Villamor 16, Velez 12, Sususco 12, Capahi 8, Cabilte 7, Macion 7, Riveral 6, Cruas 5, Calipayan 2. - BANAT NEWS