CEBU, Philippines - Magpinaksitay karon ang Hannah ug ang Tubigag Manok sa semifinals sa nagkainit nga aksiyon sa Asturias Town Fiesta Inter-barangay caging didto sa sports complex sa maong lungsod.
Sugdan ang kumbati sa alas-7:30 sa gabii, dayon sundan kini sa laing semifinal match tali sa Poblacion ug ASA nga maoy main game sa alas-9:30 sa gabii.
Ang top two winners maoy mag-abot sa "do-or-die" championship sa Agosto 5, samtang ang nahabiling duha ka teams maoy mag-ilog sa ikatulong dapit.
Gipasiugdahan sa kagamhanan sa lungsod sa Asturias ubos sa liderato nilang Mayor Allan Adlawan ug Vice Mayor Joel Dumdum, ang liga usa lamang sa mga lamas sa tinuig nga kapistahan sa ilang mahal nga patron Sr. San Roque sa Agosto 16, 2012. (BANAT SPORTS)