CEBU, Philippines - Gihubo ni WBO No.1 bantamweight contender AJ 'Bazooka' Banal ang iyang WBO Asia Pacific bantamweight belt human gipahibalo ang umaabot niyang world title fight batok ni Thai Pungluang Sor Singyu sa Oktubre 20 didto sa SM Mall ofAsia Arena sa kaulohan.
Si Banal (28-1, 20KOs) mosuway pagsakmit sa WBO bantamweight title batok ni Sor Singyu (42-1, 27KOs) sa main event sa "Pinoy Pride XVII: Philippines vs. the World."
Si WBO Asia Pacific president Leon Panoncillo mibutyag nga gibakante na nila ang WBO Asia Pacific belt ni Banal.
Ang bakanteng bakus ilogan nilang Vincent Palicte (14-3-1, 7KOs) ug Frederix Rodriguez (8-2-1, 6KOs) sa Agosto 11 didto sa Mandaluyong City Gymnasium.
Sa supporting bout sa fight card nga gipasiugdahan sa Joven Sports Promotion ni Joven Jimenez, ang Philippine light welterweight champion nga si Adones Cabalquinto makigsangka sa igsuon ni Vincent nga si Aston Palicte.
Usa ka special attraction fight ang masaksihan tali sa prospect nga si Joebert Alvarez batok sa beteranong si Nelson Llanos alang sa Luzon Professional Boxing Association light flyweight title. (BANAT SPORTS)