Cebu Challenge Cycling Classic gilusad

CEBU, Philippines - Human mahilom sud sa pipila na ka katuigan, ang mga dekalibreng cyclists lukop nasud gipaabot na usab nga maghugop dinhi sa Sugbu atol sa ipahigayong Cebu Challenge Cycling Classic sa Agosto 8-12.

Anha kini manukad sa Cebu Provincial Capital grounds.

Ang lumba nga gipasiugdahan sa Guardians Delta Force International Inc. (GDFII) uban sa suporta sa Provincial Government, tipik lamang sa mga kalihukan sa kasaulogan sa 443rd founding anniversary sa Cebu Province. 

Kini ang gipahibalo ni GDFII national chairman David Odilao Jr. atol sa pormal nga paglusad sa maong kalihukan kagahapon didto sa Grand Majestic sa Cebu Grand Convention Center.

Matud ni Hall of Famer Odilao nga gilusad nila pagbalik ang maong lumba aron mahatagan og kahigayonan ang mga top riders sa nasud nga mopakita sa ilang abilidad sa maong natad sa paugnat sa kusog.

Sa pagka karon, napulo na ka teams ang nipadayag sa ilang partisipasyon ug kini naglakip sa Philippine Navy 1 and 2, Philippine Air Force, Pangasinan, Agusan del Sur, LBC A ug B, LPG America Vinyl, Danao Cyclists ug host Cebu Province.

Mga top cyclists nga nikompirmar sa ilang partisipasyon mao si national mountainbike team member Niño Surban, Jaybop Pagnanawon ug triathlete nga si Noy Jopson.

Ang kalihukan adunay prologue plus tulo ka stages ug criterium nga ipahigayon sa nagkadaiyang bahin sa probinsiya.

Ang prologue adunay 40-kilometer individual time trial sa Agosto 8 diha sa South Road Properties.

Ang Stage 1, gikan sa Cebu City paingon sa Bogo City nga adunay kinatibuk-ang 101.7 kilometros. Mao kini ang massed-start race sa Agosto 9, sundan sa stage 2 gikan sa Bogo paingon sa Toledo nga adunay gilay-on nga 86.9 kilometros unya sa Agosto 10.

Ang stage 3 sa Agosto 11 magsugod sa Toledo paingon sa Argao nga mosubay og 186.7 kilometros.

Tapuson ang lumba pinaagi sa 60-km criterium duol sa Cebu International Convention Center (CICC) sa Mandaue City.  (BANAT SPORTS)