UV, SWU gikaintapan

CEBU, Philippines - Miangkon nang daan ang lima ka collegiate coaches sa Cebu Schools Athletic Foundation Inc. (CESAFI) nga maglisod sila pagtumba sa University of the Visayas (UV) Lancers ug sa Southwestern University (SWU) Cobras.

Nabasa na nila sa ilang mga palad nga ang UV Lancers ug SWU Cobras maoy magbagat sa finals, apan ilang paninguhaon kutob sa ilang mahimo nga modaog sa pagbukas sa 12th CESAFI season karong Hulyo 29 diha sa Cebu Coliseum.

Hinuon, nasagmuyo pag-ayo si CESAFI commissioner Felix O. Tiukinhoy Jr. kay wala motunga sa presscon kagahapon didto sa Linea Restobar sa I.T. Park si SWU Cobras coach Raul 'Yayoy' Alcoseba ug UV Lancers coach Felix 'Donbel' Belano.

Ang duha mao unta ang han-okan sa mga pangutana kun unsay ilang ikasulti sa kahimtang sa tagsa-tagsa nila ka teams karong tuiga.

Wala sab motambong ang coach sa University of Cebu (UC) Webmasters nga si Roel Gomez, apan diha ang iyang assistant nga si Jover Samonte.

Gipaneguro ni Tiukinhoy nga mas nindot ang liga karon nga season ilabi na kay balanse na ang mga teams tungod sa upat ka foreigners nga gitugotan sa pagduwa.

Dili kini susama sa miaging tuig nga ang 6-foot-9 nga si Junemar Fajardo sa UC maoy midominar, apan karon may Cameroonians sa SWU Cobras nga sila si Justin Aboude ug Benoit Mbala, Steve Cedrick Akomo ug si Stephen Que, usa ka Fil-Chinese nga maoy labing mubo sa mga foreign players.

Si Samonte sa iyang bahin nagkanayon nga 50-50 ang ilang tsansa karong tuiga ug iyang giangkon nga bisan og wala na si Fajardo, andam silang mokumbati ug depende lang sa preparasyon sa team ang pagdaog.

Si coach Edito Salacut sa University of San Jose-Recoletos (USJ-R) Jaguars, nagkanayon nga dili pa siya kaseguro sa finals tungod kay aduna sila’y sekreto kun unsaon pagdepensa ang mga tag-as nga players.

Ang bag-ong coach sa University of San Carlos (USC) Warriors nga si Julian Macoy nagkanayon nga dili pa nila maseguro kay samtang duwaon pa, dili pa mahibaw-an kun kinsay   modaog kay adunay panahon nga demalason sab ang players. - BANAT NEWS