Adlawan misidlak sa Badian

CEBU, Philippines - Napakyas si Jon-Jon Adlawan pagsakmit og duha ka korona sa 1st Mayor Robburt Librando Motocross Cup niadtong Domingo didto sa Badian sa habagatang bahin sa lalawigan sa Sugbu.

Si Adlawan, kinsa gipaluyohan sa J.O Racing Honda sa Denmark ug Kopiko/Energy, nidaog sa open production title ug ikaduha sa pro open division nga giharian ni Donark 'Dondon' Yuson. Ang teammate ni Adlawan sa PowerSports Racing nga si Jubenille Abellar mi-okupar sa ikatulo sa maong kategoriya.

Sa laing bahin, si Jougee Basco maoy nanghawod sa novice class, gisundan ni Ian Reyes alang sa ikaduha, samtang si Donkey Sanchez nalandig sa ikatulo.

Naghari sab si Basco sa intermediate class, gisundan nilang Andrew Canlas ug Reyes alang sa ikaduha ug ikatulo nga dapit.

Wala hinuon magmahay si Sanchez kay siya ang nakatag-iya sa open enduro ug underbone titles.

Nakakawat sab og atensiyon si Siegfred Ornopia sa Keiz BJ Motors dihang iyang gidominar ang veteran A category batok nilang Rocel Gungob ug Gener Sicad.

Hinuon, si Sicad nakabitbit og championship trophy dihang iyang gipilde silang Pantaleon Busquit ug Butch Flores sa veteran B division.

Wala sab magpa-alkanse ang mga anak ni Siegfred nga sila si Brylle, Ken ug Keizer. Si Brylle mipahiluna sa ikaduha sa mini class division nga gipangunahan ni BJ Pepito, samtang sila si Ken ug Keizer mitapos sa una ug ikatulo sa peewee division.

Nakabitbit sab og korona si Denmark Supatan dihang iyang giharian ang beginners open batok nilang Junior Disipolo ug Rolly de la Calzada. (BANAT SPORTS)