CEBU, Philippines - Gisirohan sa Don Bosco Technology Center (DBTC) booters ang Paref-Springdale, 2-0 sa football event sa 2012 St. Ignatius de Loyola Goodwill Games kagahapon didto sa Sacred Heart School-Ateneo de Cebu sa Brgy. Canduman sa Mandaue City.
Sa laing duwa sa 17-under, ang Abellana National School-Pomeroy ni coach Francis Ramirez midaog lang og usa ka lugas batok sa host SHS-Ateneo, 1-0.
Sa 12-under category, ang SHS-Ateneo midaog sa Springdale, 1-0, apan napilde ngadto sa Canduman.
Ang torneyo mosubay og single round robin format diin ang top two teams maoy magsangka alang sa kampiyonato karong adlawa.
Gawas sa football, ang SHS-Ateneo mo-host sab sa swimming ug basketball.
Ang swimming competition tapuson karong adlawa, samtang ang basketball pagabuksan pinaagi sa 17th edition sa Sacred Heart-Ateneo Alumni Basketball Athletic Association (SHAABAA).
Napulo'g-usa (11) ka teams nga pangulohan sa defending champion Dynamic Power ang mosalmot sa SHAABAA cagefest.
Lain pang koponan nga mopakita'g aksiyon naglakip sa Gaisano Capital, Fiesta Cebuana Caters, Twin Towers Farms Gold, Goldberry Suites and Hotel, Insular Square, RDAK, Twin Tower Farms Blue, A-Team, Cebu Landmasters ug JAPFA.
Sunod semana, ang SHS-Ateneo mopasiugda og 2012 St. Ignatius Run diha sa Insular Square sa Mandaue City.
Aduna kini tulo ka kategoriya -- 3K, 6K ug 16K.
Ganting salapi ang maangkon sa mga mananaog sa matag dibisyon.
Ang registration fee nagkantidad og P450 sa 16K, P350 sa 6K ug P300 sa 3K run. Libre na niini ang singlets. (BANAT SPORTS)