CEBU, Philippines - Naka-ipsot ang Catarman cagers batok sa defending champion Poblacion sa iskor, 88-85 pinaagi sa pagtimon ni ex-UV Lancer center Edrian Lao aron makauna sa Game 1 sa ilang best-of-three championship series sa Seniors Division atol sa nagpadayong 6th Mayor Addy Sitoy Cup basketball tournament kaniadotng Sabado sa gabii nga gisaksihan sa nagdasok nga basketball fans didto sa Cordova Sports Complex.
Naglabaw unta og 13 puntos ang Poblacion sa 8:31 ang oras sa third period apan kalit lang nagmangtas ang Catarman ug misaler sab ang ilang hugot nga trapping defense aron hinay-hinay nga makasikit.
Misamot kanindot ang duwa dihang nagbanos-banos og pamuntos silang Lao ug ang iyang beteranong kaatbang nga si Mark Abadia ug miresulta kini'g pipila ka lead changes ug kadaghan sab magtabla.
Nasakmit sa Catarman ang labaw sa kataposang 1:58 sa fourth quarter pinaagi sa paningkamot nilang Lancer Junnard Premacio ug Lao kinsa maoy nangu sa opensa sa ilang 19 ug 15 puntos matag usa.
May higayon pa untang modaug ang Poblacion sa nahibiling 37 segudos apan misipyat sila sa ilang kataposang ball possession.
Si Abadia maoy nangu sa Poblacion sa iyang 20 puntos.
Ang Game 2 ipahigayon unya sa Hulyo 20 diin tinguha sa Catarman nga haruson ang finals aron ilogon ang titulo nga gihuptan sa Poblacion.
Sa preliminary, gipatapsingan sa Jence Ibabao ang Alegria sa iskor, 81-80 aron moabante ngadto sa semifinals sa usa ka kulba-hinam kaayong sangka ubos sa SK Category.
Gilabay sa Alegria ang ilang singko puntos nga labaw sa nahibiling 54 segundos sa duwa tungod sa ilang mga turnovers.
Puntos matag usa:
First Game: (SK Category)
Jence Ibabao (81)--- Mendoza 30, Seguras 16, Tirol 13, Urot 8, Nulada 7, ando 4, Camaso 3, Cua 2
Alegria (80)--- Inoc 17, Dungao 16, Wahing 13, Arong 9, Wahing 6, Nunez 6, Arong 6, Oktubre 5, Boringa 2
Second Game: (Seniors Division)
Catarman (88)--- Lao 19, J. Premacio 15, Andales 12, Premacio 11, Pacaldo 7, Inihao 5, Calimbo 3, Aro 3, Premacio 2, Yburan 2
Poblacion (85)--- Abadia 20, Celocia 13, Degamo 12, Varron 11, Almodal 8, Baguio 5, Quinaging 4, Tajanlangit 4, Celocia 3, Baguio 2, Dalumpines 2. . - BANAT NEWS