Lozada, Alix, Saldua misidlak sa Manhattan Dancesport C'ships

CEBU, Philippines - Misidlak ang bitoon sa dance athletes sa Sugbu nga sila si Mae Lozada, Victoria Alix ug Renante Saldua sa ilang tagsa-tagsa ka dibisyon sa 2012 Manhattan Dancesport Championships sa miaging weekend didto sa Marriott Hotel sa Brooklyn, New York.

Ikatulo na kini ni Lozada, kinsa nidaog sa iyang ikatulong sunod-sunod nga kompetisyon didto sa Estados Unidos.

Si Lozada nga nakigpares gihapon ni Dennis Sy sa Dumaguete City, nanghawod sa amateur    pre-champ latin division.

Atol sa final heat, sila si Lozada ug Sy maoy numero uno sa tanang sayaw gikan sa chacha, samba, rumba ug jive.

Nakakuha og dakung rating silang Lozada ug Sy batok sa tandem nilang Anastasiya Alksne ug Andrew Polunin. Sila si Annet Blom ug Steve Yi midaog og bronze medal.

Sa sayo pa, sila si Lozada ug Sy mikabkab og bulawan sa pre-champ latin event sa Philadelphia Festival and Dancesport Championship niadtong Abril.

Mikubkob sab og bulawan si Lozada atol sa Yankee Classic DanceSport Championship didto sa Boston sa miaging bulan.

Sa laing bahin, si Alix ug ang dugay na kaayo niyang dance partner nga si Renante Saldua milangkat og bulawan sa pre-champ ballroom category nga naglatid sa waltz, tango, foxtrot ug quickstep.

Nanghawod sab sila sa ilang kategoriya atol sa Philadelphia Festival duha na bulan ang milabay. (BANAT SPORTS)