CEBU, Philippines - Midaog ang University of San Jose-Recoletos (USJ-R) Jaguars batok sa University of Cebu (UC) Webmasters, 89-77 sa ilang tune-up game alang sa 2012 season sa Cebu Schools Athletic Foundation Inc. (CESAFI) basketball tournament niadtong Martes didto sa Cebu Coliseum.
Gawas sa ilang pressure defense, kugihan sab kaayong molayat ang Jaguars ni coach Edito Salacut hinungdan nga yano kaayong misirit ang ilang labaw ngadto sa 20 puntos sa second period, 27-47.
Hinuon, nagpakita sab sa ilang abilidad sa pag-rally ang Webmasters kay human sila malubong sa halftime sa iskor nga 38-51 ila kining naapas ngadto na lang sa singko puntos, 61-66 paghuman sa third period kortesiya nilang Benedict Ocariza ug Kevin Quilantang.
Misikit sila'g maayo pagsugod sa fourth quarter, 63-66 pinaagi sa rally nga gipasiugdahan ni Quinton Brian Heruela. Apan misukli og sagunson nga sayes puntos si Matthew Parker aron inaton ang labaw sa Jaguars ngadto sa nuybe puntos, 82-73 sa nahabiling 2:30 sa duwa.
Si Abulaiz Suliman kinsa anaa na sa iyang katapusang season sa CESAFI nga magsugod karong Hulyo 29, maoy nangu sa Jaguars sa iyang 21 puntos samtang si Parker midugang og 12 puntos.
Si Heruela maoy nangulo sa Webmasters sa iyang 15 puntos.
Sa laing bahin, gisugdan na sa CESAFI secretariat ubos ni commissioner Felix O. Tiukinhoy, Jr. ang screening sa mga players uban sa Commission on Higher Education (CHED). (BANAT SPORTS)