CEBU, Philippines - Nanganti ang taga-Bukidnon nga si Charlie 'Steelbar' Cabilla (12-10, 2KOs) nga mohimo'g "upset" batok ni Vergilio 'Maton' Silvano (11-2, 6KOs) sa ilang sangka alang sa bakanteng Philippine Boxing Federation (PBF) light flyweight sa main event sa 'Fight Fury' sa Hulyo 29 didto sa J Centre Convention Hall sa A.S Fortuna St., Mandaue City.
Si Cabilla wala pa huwasi gikan sa duha niyang kapildihan batok nila ni Thai Petch Sor Chitpattana alang sa WBC Youth title niadtong Enero ug ni ALA Boxing Gym fighter Jerson Mancio niadtong Mayo didto sa Mandaue.
Tungod niini, tinguha ni Cabilla nga modaog batok ni Silvano aron mabuhi pagbalik ang iyang boxing career.
Sa iyang bahin, ang lumad nga taga-Dalaguete, Cebu nga si Silvano mosuway pagkulit sa ika-11 niyang sunod-sunod nga daog.
Katapusan siyang midaog niadtong Mayo 11 batok ni Jonathan Ricablanca pinaagi sa sixth round TKO.
Sa supporting bouts sa fight card nga gipasiugdahan sa Omega Pro ug ni Thai boxing patron Naris Singwangcha, ang Phl No. 7 flyweight contender nga si Jason Canoy makigharong ni Ryan Bongcawil, samtang si Jack 'Golden Boy' Tepora moaway ni JR Salvador sa Phil-Aust Boxing Club (PABC). - BANAT NEWS