Philippine team mipina dayon og daog
CEBU, Philippines - Mipakita dayon sa ilang abilidad ang mga sakop sa Team Pilipinas aron mosakmit sa labing una nilang daog sa 2012 World Pool Team Championship didto sa Tongzhou Luhe High School gym sa Tongzhou district, Beijing, China.
Gipangulohan sa legendary pool master nga si Efren 'Bata' Reyes, ang Team Pilipinas gilangkuban nilang Francisco 'Django' Bustamante, Dennis 'Robocop' Orcollo ug sa Sugbuanang si Rubilen Amit.
Ang mga Filipino cue artists yano kaayong midispatsar sa una nilang duwa batok sa Indonesian Team nila ni Ricky Wang, Isral Afrinneza Nasution, Muhammad Zulfikri ug Amand Rahayu sa Indonesia, 4-2.
Sa laing duwa sa Group-A, ang host China nga adunay duha ka team mipilde sa Canada, 5-1 ug Australia, 4-2.
Ang Croatia mipukan sa Estonia, 5-1, gisirohan sa Taiwan ang Mongolia, 6-0, samtang ang Japan mipilde sa Poland, 4-2.
Moabot ngadto sa $300,000 ang gitaganang ganting salapi ning usa ka semana nga torneyo ubos sa bendisyon sa World Pool and Billiard Association (WPA).
Ang kampiyon mobulsa og $80,000, samtang ang runner-up makadawat og $40,000. (BANAT SPORTS)
- Latest
- Trending
