Kudos Pinoy Olympians!

Kumusta mga Tirador! Nahilom kita sa makadiyot sa atong lindog tungod sa ka-busy nato sa ubang gimbuhaton.

* * *

Magsugod na ang London Olympics 2012 ug sa ika-19 ka appearance sa Pilipinas sa maong prestihiyosong kalihukan sa paugnat sa kusog malaumon gihapon ang Pilipinas nga makadala og labing unang Olympic gold medal.

Usa sa gilaumang makadala niini mao ang nag-inusara natong boksidor nga si Mark Barriga, kinsa moaway ubos sa light flyweight division. Si Barriga gihulagway sa ubang media reports nga susama og abilidad sa atong Olympic silver medalist nga si Mansueto 'Onyok' Velasco.

Samtang sa usa ka sports news sa UK Daily Telegraph nga migawas kagahapon, ilang ginganlan og "star performer" ang Filipina weightlifter nga si Hidilyn Diaz. Si Diaz ika-11 sa 58kg. weightlifting competition niadtong 2008 sa edad nga 17-anyos.

Karong miabot na siya sa hustong edad, gipaabot nga mas mosaka pa ang iyang performance ug usa karon sa gipanid-an sa ubang mga nasud nga higpit unya nilang makaatbang. Si Diaz pa ang labing unang babayeng Filipino nga nakaapil sa Olympics.

Samtang wala usab magpaulahi ang Pilipinas sa natad sa athletics, duha sa atong long jumpers nga mi-qualify sa Olympics nga sila si Marestella Torres ug steeplechaser Rene Herrera.

Duha usab ka mga archers ang bag-ohay lang nahatagan og kompirmasyon nga makasalmot ug sila mao si Rachel Anne Cabral ug Mark Javier, kinsa malampusong mitapos ug napakita og maayong labok sa World Archery Championships didto sa Ogden, Utah, USA, nga maoy katapusang qualifier alang sa London Olympics.

Lakip sa mokumbati mao ang judoka nga si Tomohiko Hoshina ug ang BMX rider nga si Daniel Caluag; swimmers Jasmine Alkhaldi ug Jessie Lacuna ingon man ang shooter nga si Brian Rosario.

Ang Pilipinas adunay siyam ka mga medalya sukad kini miapil sa Olympics niadtong 1924. Duha ka silvers ug pito ka bronze.

Atong suportahan ang atong mga atleta, good luck kanila.!

* * *

Duna ko'y nakit-ang na-published nga picture alang sa usa ka gi-promote nga mixed martial arts tourney dinhi sa Sugbu. Nakatawa ko kay imbes nga ang mga main event fighters ang naa sa hulagway kadto man hinuong mga organizers! Walay sala niini ang photographer ha.

Kinsa diay magkumbati, ang organizers o ang mga fighters? Kamo na lay sabot.

* * *

PAHIBALO: Gidapit ang tanang mga alumni brothers and sisters sa Alpha Sigma Omega International Service Fraternity Inc. rehistrado man o wala pa sa Grand SIOUX Alumni Council (GSAC) sa pagtambong sa "Tapoktapok sa Alumni" karong Hulyo 15 alas-5 sa hapon diha sa Family Choice sa Country Mall, Cebu City. Pagdala lang og P200.

* * *

PAGTULON-AN: Daghang makat-onan gikan sa mga kasaypanan. Kini kun bukas kita pagdawat sa atong sayop.  

Email: [email protected]