St. Benilde giniba ang Lyceum

MANILA, Philippines - Binalikat ni Carlo Lasti­mosa ang College of St. Be­nilde upang angkinin ang 70-61 panalo kontra sa Lyceum of the Philippines sa 88th NCAA men’s bas­ketball kahapon sa The Are­na sa San Juan City.

Nagwala ang skipper ng Blazers sa huling yugto nang ibagsak ang 10 sa 14 naitalang puntos para pa­ngunahan ang pamatay na atake na nagbangon sa tropa ni coach Richard Del Rosario mula sa 51-57 iskor may 8:29 sa orasan.

Mula rito ay nagpasabog ang Blazers ng 14-0 bomba at si Lastimosa ay may anim na puntos mula sa turnovers ng Pirates pa­­ra sa 65-57 abante nila.

Ang panalo ay naglagay sa St. Benilde kasalo ang Letran, San Beda at Jo­se Rizal University sa li­derato tangan ang 1-0 ba­raha, habang may 0-1 kar­ta ang Lyceum ka­gaya ng San Sebastian, Ma­pua at Arellano.

Naunang nagdomina ang Blazers at hinawakan ang 33-31 bentahe sa halftime pero gumana ang sho­oters ng Pirates sa pa­mumuno ni Ryan Cayab­yab para ibigay sa tropa ni coach Bonnie Tan ang 46-40 bentahe.

Nagtulung-tulong sina Jo­nathan Grey at Juan Ta­ha sa 9-2 palitan upang agawin muli ang liderato, 49-48, pero tinapos ng Pi­rates ang ikatlong yugto mula sa limang freethrows patungo sa 53-49 bentahe.

Apat na puntos mula kay Shane Ko ang naglayo sa Pirates sa 57-51, pe­ro nan­lamig ang Lyceum, ha­bang pinagningas ni Las­timosa, may 6 rebounds at 6 assists, ang Blazers patungo sa malakas na pag­tatapos.