Amit, Ranola Napatalsik na

MANILA, Philippines - Bigo pa rin ang Pilipinas sa hangaring makakita ng kauna-unahang lady pool player na magiging kampeon sa World Women’s 9-Ball Championship.

Sa idinadaos na kompetisyon sa Richgate Shopping Center sa Shenyang, China, tuluyang natapos na ang laban nina Rubi­len Amit at Iris Ranola nang parehong natalo sa kanilang mga laro sa pag­bubukas ng knockout stage noong Miyerkules.

Hindi nailabas ng multi-gold medalist sa SEA Ga­mes na si Amit ang la­rong ­nasilayan sa kanya sa Group eliminations na kung saan nanalo siya ng dalawang sunod para agad na umabante mula sa winner’s group, nang lasapin ang 2-9 pagkatalo sa kamay ni Chichiro Kawahara ng Japan.

Sinikap naman ni 26th SEAG 8-ball at 9-ball gold medalist na si Ranola na bigyan ng magandang laban si four-time champion Allison Fisher ng Great Bri­tain pero mas lutang ang ka­ranasan ng katunggali para sa 9-6 panalo.

Alternate break ang format sa knockout stage at sina Kawahara at Fisher ay minalas din na namaalam sa laban nang ang una ay yumukod kay Siming Chen ng China, 0-9, habang talo si Fisher kay Tan Ho Yun ng Chinese Taipei, 8-9.

Ang pinakamagandang laro na nasilayan ng pambato ng bansa sa nasabing kompetisyon na may basbas ng World Pool Asso­ciation (WPA) ay noong 2007 nang pumangalawa si Amit kay Pan Xiao Ting ng China.