Pilipinas mosalmot sa 2nd Asian U. Water Polo

CEBU, Philippines - Mosalmot ang Philippine All-Star team sa 2nd Asian University Water Polo Championships nga adto ipahigayon sa Singapore karong Hunyo 13-21.

Mao kini ang gipahibalo ni Davig Ong, ang presidente sa Federation of School Sports Association of the Philippines (FESSAP) nga maoy bugtong national university sports association nga gi-ila sa International University Sports Federation (FISU).

Ang Philippine Swimming League (PSL) ubos sa ilang presidente nga si Susan Pap, adunay lig-on nga men's water polo team nga makasugakod batok sa host Singapore sulod sa siyam ka adlaw nga kumpetisyon.

Ang Pilipinas mosalmot sa labing unang higayon sa Asian University Water Polo Championship ubos sa pagdumala sa Asian University Sports Federation (AUSF) didto sa Singapore kinsa mao sab ang nag-host sa 1st Youth Olympic Games duha na ka tuig ang milabay.

Ang Philippine delegation nga gipaluyohan sa San Miguel Corporation ubos sa ilang presidente nga si Ramon S. Ang, pangulohan ni Col. Ariel Querubin kinsa maoy FESSAP Deputy Secretary General. Siya kuyogan sa FESSAP Executive Committee nga pangulohan ni chairman of the Board Alvin Tai Lian kinsa mao sab ang presidente sa Filipino Chinese Amateur Athletic Federation (FCAAF) ug sa ubang FESSAP board members nga silang Thomas Espina, Tisha Abundo, William Aw, Ricardo Cuartero, Christian Tan ug Dr. Diosdado Amante.

"SMC’s strong commitment to youth sports development in the country is one major reason why the FESSAP has sought the company's support," matod pa ni Ong. 

Siya nagkanayon sab "The FESSAP truly believes that SMC's involvement through Mr. Ramon S. Ang will boost the morale of the athletes in this university-level water polo men's competitions."

Sa miaging tuig, ang FESSAP gipahalipayan sa Philippine Senate tungod sa ilang pagsalmot sa 26th Summer Universiade didto sa Shenzhen, Guangdong Province sa China niadtong Agosto 12-23, 2011. (GGM)(BANAT NEWS)