Solo 2nd puntirya ng Boosters vs Aces

MANILA, Philippines - Pupuntiryahin ng nagdedepensang Petron Blaze ang solong ikalawang puwesto, habang target naman ng Talk ‘N Text at Powerade ang kanilang ika­lawang sunod na panalo.

Haharapin ng Boosters ang Alaska Aces ngayong alas-6:30 ng gabi matapos ang salpukan ng Tropang Texters at Powerade Tigers sa alas-4:15 ng hapon sa elimination round ng 2012 PBA Governors Cup sa Smart-Araneta Coliseum.

Kasalukuyang tangan ng Rain or Shine ang lide­rato mula sa malinis nilang 3-0 kartada kasunod ang Petron Blaze (2-1), B-Meg (2-1), Barangay Ginebra (1-1), Barako Bull (1-1), Alaska (1-2), Talk ‘N Text (1-2), Air21 (1-2) at Meralco (1-2).

Nanggaling ang Boos­ters sa 87-102 kabiguan sa Tropang Texters noong Mi­yerkules kung saan nag­bida sina Ranidel de Ocampo at Japeth Aguilar, habang natalo naman ang Aces sa Tigers, 97-114, noong Biyernes.

Sa unang laro, mag-u­unahan naman ang Talk ‘N Text at Powerade na ma­ilista ang kanilang ikala­wang sunod na panalo.

Ang 6-foot-5 import ng Tigers na si Omar Sneed ay ikinunsidera ng Tropang Texters sa gitna ng kanilang best-of-seven semifinals series ng Aces sa 2010 Fiesta Conference bilang kapalit ni Shawn Daniels.

Ngunit hindi kinuha ni coach Chot Reyes ang 35-anyos na si Sneed dahil wala ito sa kondisyon matapos ang dalawang linggong pakikipag-ensayo sa Talk ‘N Text.

Pero pagkatapos ng da­lawang linggong ensayo ay nagdesisyun ang TNT na manatili sa piling ni Daniels.

“We got an import that can match-up with the import of any opponent. I think we got a chance every time now,” sabi naman ni Po­werade coach Bo Perasol kay Sneed na kumolekta ng 13 points, 11 rebounds at 9 assists sa kanyang unang laro sa PBA.