Ginebra, Meralco magsangka na sa Hoops Dome

CEBU, Philippines - Mopakita og impresyon ang Barangay Ginebra Kings atubangan sa ilang Sugbuanong dumadapig dihang ilang sangkaon ang Meralco Bolts sa "out-of-town" game sa PBA Governor's Cup karong adlawa didto sa Hoops Dome sa barangay Gun-ob, Lapu-Lapu City.

Ang Kings ug Bolts magbagat sa alas-6:45 sa gabii diin ang duha ka koponan nagtinguhang mobangon gikan sa ilang kapildihan.

Si Ginebra coach Siot Tanquincen, kinsa nakontrobersyal karon tungod sa isyu nga paghulip kaniya isip head coach sa koponan, mosuway pagbangon human mapilde ngadto sa B-Meg Derby Ace Llamados, 86-99 niadtong Domingo.

Pangulohan sa "Best Player of the Conference" nga si Mark Caguioa, ang Ginebra mogamit sa lawon nilang line-up nga gilangkuban ni import Cedric Bozeman, Jayjay Helterbrand, Rudy Hatfield, Dylan Ababou, Erik Menk, KG Canaleta,   Mike Cortez, Billy Mamaril ug Sugbuaong pointguard Robert Labagala.

Sama sa Ginebra, ang Meralco tinguha usab nga mobangon human sila gilubong sa Petron Blaze sa miagi nilang duwa sa iskor nga 88-101.

Ang Meralco mosandig sa ilang import nga si Chamberlain Oguchi uban sa mga lokal nga sila si Asi Taulava, Macmac Cardona, Chris Ross, Solomon Mercado, JR Reyes, Mark Macapagal ug Paul Artadi. (BANAT SPORTS)

Show comments