Sa depensa dag-on -- Gregorio

CEBU, Philippines - Nangangkon si Meralco Bolts coach Ryan Gregorio nga ang ilang ipakitang kakugi sa depensa maoy mahimong barometro sa kadaugan nila   batok sa Barangay Ginebra Kings sa "out-of-town" game sa PBA Governor’s Cup ugma didto sa Hoops Dome sa Lapu-Lapu City.

Atol sa press conference kagahapon didto sa The Old Spaghetti House sa SM City, si Gregorio miangkon sab nga dili sayon pildihon ang Kings ug ang hugot nga depensa ug gikusgon maoy himuon nilang hinagiban aron modaog.

Medyo may swerte sab ang Bolts karong panahona tungod kay matud pa ni Gregorio, himsog ang ilang team gawas lang kang Mark Borboran nga adunay piang sa tikod.

Sumala pa ni coach Gregorio nga tungod sa kamubo lang sa format karon nga gigamit sa maong conference, iya paagi nga molungtad og dugay mao ang pagsige'g daog.

Ang napulo ka teams moduwa’g siyam ka higayon ubos sa single round robin diin ang Top 6 human sa elimination maoy mo-abante, samtang ang nahabiling upat matagak.

Malipayon siyang mitug-an nga daku og gamit kanila sa opensa si Asi Taulava ilabi na sa iyang mga offensive rebounds. Hinuon miingon si Gregorio nga dili siya moangkon nga natagbaw siya sa ilang import nga si Chamberlain Oguchi.

Iyang gipaneguro nga basta pirme lang makadawat og bola si Macmac Cardona nga maoy usa sa iyang pambato sa opensa, daku gyud sila og purohan nga modaog.     (BANAT SPORTS)