CEBU, Philippines - Waka tugoti sa Lion Tiger/USJ-R Jaguars nga makaiskor ang San Marino Corned Tuna/USPF Panthers sa halos sayes minutos sa fourth quarter hinungdan nga yano nilang naangkon ang low-scoring ballgame, 63-46 ug aron sakmiton ang ikatulong puwesto sa 6th CESAFI Partner’s Cup kagahapon didto sa Cebu Coliseum.
Ning pagsuwat, padayon pang nagkumbati ang Prime Asia/Lancers ug Kia Motors/CIT-U Wildcats sa Game-2 sa ilang "best-of-five" title showdown.
Milanat una'g kapin singko minutos sa wala pa madugangi ang iskor sa San Marino didto sa fourth period. Natapos ang third quarter sa iskor nga 48-36 pabor sa Lion Liger. Apan human sa basket ni Brylle Meca, 38-48 sa nahabiling 8:39 sa fourth period, wala na kini maka-iskor pa ug miirog kini, 40-58 human sa basket ni Earvin Ferraren.
Si Jason Olbedado maoy nangu sa Lion Tiger pinaagi sa iyang 18 puntos, gisundan ni Kyle Lajato nga adunay 13 puntos ug James Regalado nga mihakot og 12 puntos.
Ang naparot nga San Marino gipangulohan nilang Joseph Sedurifa ug James Ferraren nga misapyaw og 14 puntos matag usa.
PUNTOS MATAG USA
Lion Tiger/USJR (63) - Olbedado 18, Lajato 13, Regalado 12, Sanchez 8, Tabaloc 7, Medalle 3, Dela Rama 2
San Marino/USP-F (46) - Sedurifa 14, J. Ferraren 14, Camello 5, E. Ferraren 4, Corcilles 4, Meca 3, Sollano 2 (BANAT SPORTS)