Nagkaanam na'g kaduol ang gikahinamang sangka nila ni Manny Pacquiao ug Timothy Bradley karong Hunyo 9 didto sa MGM Grand Garden Arena sa Las Vegas, Nevada.
Si Bradley nga mas gamay kun tan-awon kumparar kang Pacquiao nanganting masugamak gyud ang fighting congressman sa Pilipinas tungod kay wala sa iyang estilo ang moatras sa away ilabi na kun lamok-lamok na.
Kini maoy usa sa hinungdan nganong gipanganlan siya sa iyang mga fans og "Desert Storm" nga daw bagyo sa disyerto kun moligis. Kun makapatay pa lang ang estorya, seguro mahadlok na ta.
Pero sa akong tan-aw sa unang round sama sa naandan, dili dayon maggara-gara si Bradley, seguradong gipahimangnoan gyud siya sa iyang trainers kabahin sa gidangatan ni Ricky Hatton dihang nakigsinukliay siya og kumo sa sayong mga rounds.
Sa ikaduhang round ngadto sa round 5 seguro, anha pa tinud-anay nga morubo-rubo si Bradley, apan dili sama sa stationary target si Pacquiao tungod kay mo-slide man kini sa wala'g-tuo nga mapuntosan siya sa Pinoy.
Gipasalig hinuon sa kampo ni Pacquiao nga ilaha nang gipraktisan ang halos tanang nahibaw-an nilang taktika nga gamiton ni Bradley, counter-punching man o agresibong pagpangatake niini.
Si Bradley uhaw sa pagsikat, ug ang kadaugan batok kang Pacquiao sa bisan unsang paagi maoy magtuboy kaniya ngadto sa mga dagkung promosyon.
Daku ang akong pagtuo kun malutsan lang ni Pacquiao og usa ka solidong kumo sa wala diha sa apapangig si Bradley kun dili man siya matumba magpanagana gyud kini nga makigsagol pa.
Apan basi sa rekord ni Bradley gahi usab kini og apapangig gani duna na siya'y mga away nga natumba gyud siya apan milahutay sa katapusang round ug mao pa ang midaog pinaagi sa unanimous decision. So, mga tirador, duna na tay ideya nga di na basta matulog si Bradley og usa ka kumo, basin duha.
Sa samang estilo ni Bradley nga daw bagyo kun mohamag, daku ang purohang ma-knockout siya ni Pacquiao nga paboritong siya maoy atakihon og una sa kaatbang tungod kay dili man gud estilo ni Pacquiao nga mosabay sa sulog sa kontra, likay-pitik ug lahos-lahos ang kinumo ang iyang bawos.
Si Pacquiao mosugal sa iyang WBO belt sa maong sangka. Kinahanglan usab nga eksplosibo ug impresibo ang ipakitang away niini aron mapapas o mahupay og gamay ang mga dughan sa iyang mga fans tungod sa kadudahan daw nga pagdaog niya kang Juan Manuel Marquez sa uwahi nilang away.
* * *
PAGTULON-AN: Ang dagan sa kinabuhi walay garantiya, walay kasigurohan ug walay sukdanan, kinahanglan lang nga imong hatagan og bili ang kinabuhi samtang buhi pa.
Email: bat69ph@yahoo.com