CEBU, Philippines - Dili lang usa, duha, kun dili tulo ka korona ang nasakmit ni Martin Nuñez atol sa fifth leg sa 2012 MS Motosuit Motocross Series nga giuloha’g “1st Congressman Benhur Salimbangon Cup” niadtong Martes didto sa Curva, Medellin sa amihanang bahin sa Sugbu.
Si Nuñez nga lumad gikan sa Talamban, mipilde ni Pepo Rubi ug fourth leg champion John Flores alang sa titulo sa expert ug pro divisions.
Gilangkat sab ni Nuñez ang korona sa intermediate category, gisundan nilang Roscel Gungob ug Ray Quirol alang sa ikaduha ug ikatulo nga dapit.
Nabulahan sab sila si Gungob ug Quirol dihang nidaog sila og duha ka championship trophies matag usa.
Si Gungob miugkat sa titulo sa novice open production batok nilang Ray Quirol ug James Duroy ug sa executive A title batok nilang Duroy ug Jun Enriquez.
Sa iyang bahin, si Quirol naghari sa local ug open enduro categories. Sila si JC Obligado ug Alex Abalo mipuwesto sa ikaduha ug ikatulo nga dapit sa duha ka dibisyon. (BANAT NEWS)