Natividad nidominar sa Bogo open chessfest

CEBU, Philippines -  Mipatigbabaw si Richard Natividad sa kapin sa 70 ka mga entrante aron maghari sa Mayor Celestino ‘Junnie’ E. Martinez Jr. open chess tournament sa miaging adlaw didto sa Bogo City Plaza sa amihanang bahin sa Sugbu.

Walay pilde si Natividad human sa 7-round Swiss system nga torneyo diin mikulit siya’g tournament-high 6.5 points aron mobulsa og P5,000.

Si Anthony Makinano mipahiluna sa ikaduha uban ang 6.0 puntos, samtang ang managsuong Ganzon -- Rommel ug Ronald mi-okupar sa ikatulo ug ikaupat nga dapit nga adunay 5.5 matag usa.

Mikompleto sa top 10 finishers mao sila si Mohmin Morsalim, Dindo Masong, Gerry Carisusa, Dennis Navales, Marc Simborio, Peterson Sia ug Erwin Ababat.

Gipasiugdahan nilang Joe Muñez, Pat Toniacao ug Dr. Ben Rodriguez, ang kalihukan usa lang sa mga highlights sa tinuig nga kapistahan sa ilang mahal nga patron San Vicente Ferrer.  (BANAT SPORTS)