Binukbukay sa Mandaue

CEBU, Philippines - Ipakita na ni Adones 'TI Yamagata' Aguelo ang iyang kabangis atubangan sa iyang katagilungsod sa pagdepensa niya sa iyang PBF featherweight title batok ni Mindanao brawler   Godwin Tubigon karong gabii didto sa Mandaue City Cultural and Sports Complex.

Ang sangka nila ni Aguelo (16-7-1, 9KOs) ug Tubigon (7-5-1, 3KOs) maoy main event sa labing unang boxing event sa TI Yamagata Promotions ni Japanese boxing patron Akira Sato.

Kini ang ikaduhang title defense ni Aguelo human niya masakmit ang PBF title gikan ni Jake Verano   pinaagi    sa fourth   round   knockout niadtong Septiyembre sa miaging tuig.

Sa katapusan niyang sangka, ang 24-anyos nga si Aguelo midaog sa usa ka impresibong 10-round unanimous decision batok ni Renan Branzuela niadtong Pebrero 19 didto sa Basak Sports Complex sa Lapu-Lapu City.

Sa supporting bouts, si WBO Asia-Pacific titlist Jason Egera sa Siaton makigsangka ni Jonriel Marcos, samtang si Jerpaul 'TI Yamagata' Valero makigbatok ni Michael Bastasa.

Mokompleto sa boxing card mao ang sangka nila ni TI Yamagata Ardie batok Robert Awetin, Jayvee Galea batok Jessie Dignos ug Margarito Mora batok Richard Rosales.  (BANAT SPORTS)