UC table tennis team lisud tupngan

CEBU, Philippines - Lisud nang tugbangan ang University of Cebu (UC) table tennisteam, kinsa mihagdaw og 11 na ka sunod-sunod nga kampiyonato sa Cebu Schools Athletic Foundation Inc. (CESAFI).

Paningkamotan ni coach Jessica Jawad-Honoridez nga iyang hatagan sa ika-12 nga korona ang UC table tennis team, kinsa miharos og tulo ka mga dagkung torneyo ning tuiga.

Ang UC maoy kampiyon sa 2012 National Private Schools Athletic Association (PRISAA) National Games sa miaging buwan dinhi sa Sugbu. Sila sab ang kampiyon sa National Open didto sa Manila human ilang gipukan ang UAAP champion nga UP team.

Ning bag-o lang, ang UC maoy nikampiyon sa Palarong Pambansa didto sa Lingayen, Pangasinan.

Ang UC table tennis team maoy dinapit sa senemanang SCOOP Forum ni Bobby 'Knight' Inoferio didto sa Baseline Restaurant kagahapon.

Nagpasalamat usab si Honoridez ngadto ni UC president Atty. Augusto W. Go ug sa kagamhanan sa siyudad sa Sugbu tungod sa ilang pagsuporta sa koponan. BANAT NEWS