Perpetual pasok na sa semis, La Salle-Bacolod namaalam na
MANILA, Philippines - Tinapos ng Perpetual Help ang laban ng University of St. La Salle Bacolod nang kunin ang 26-24, 19-25, 24-26, 28-26, 15-12 panalo kahapon sa 9th Shakey’s V-League quarterfinals na handog ng Smart sa The Arena sa San Juan City.
Ang tibay ng dibdib ang siyang sinandalan ng Lady Altas nang bumangon mula sa 1-2 deficit sa best of five series at 4-8 sa deciding fifth set upang ipalasap sa Lady Stingers ang kanilang ikalimang pagkatalo sa pitong laro upang mamaalam na sa ligang inorganisa ng Sports Vision katuwang ang Shakey’s Pizza.
May 29 hits si Thai import Pornpimol Kunbang na kinatampukan ng 23 kills at 5 blocks habang sumuporta rin sina Sandra delos Santos, Norie Diaz at April Sartin at ang Lady Altas ay naging ikatlong koponan na umabante sa semifinals sa kanilang 4-1 baraha.
Ang determinasyong manalo ay tunay na nakita sa koponan sa deciding fifth nang balewalain nila ang apat na puntos na abante ng Lady Stingers sa pagpapakawala ng walong sunod na puntos para sa 12-8 bentahe.
May 17 putos si Delos Santos habang tig-16 pa ang ibinigay nina Diaz at Sartin para samahan ng Lady Altas ang Ateneo (6-0) at UST (4-0) sa semis sa ligang may ayuda rin ng Accel at Mikasa.
May 20 puntos, kasama ang 5 blocks , si Jovelyn Gonzaga para ibandera ang natalong koponan.
Ang larong ito at ang ikalawang laro kahapon sa pagitan ng San Sebastian at FEU ay mapapanood ngayon sa ganap na alas-7 ng gabi sa AKTV-13.
- Latest
- Trending
