Diapera yawi kadaugan sa San Marino batok sa Gaisano-Tisa

CEBU, Philippines - Mipasulod si Rommel Diapera sa iyang 17 ka puntos sa third period, samtang sila si Fritz Dajalos ug James Ferraren midaginot og mga puntos dihang ang San Marino Corned Tuna/USPF Panthers milampurnas sa Gaisano Capital-Tisa/UC Webmasters, 79-72 sa quarterfinal round sa 6th CESASAFI Partner's Cup men's basketball tournament kagabii didto sa Cebu Coliseum.

Si Diapera miposa og tulo ka triples sa iyang hapit nga perpektong opensiba sa third quarter aron tabangan ang San Marino pagposte og 51-44 nga bentaha. Hinuon, ang Gaisano-Tisa mikalingaw og kitkit sa labaw ug miabot na lang og usa ka punto sa iskor nga 55-56 paingon sa final period.

Apan silang Ferraren ug Dajalos mitusak og kuwatro puntos matag usa aron inaton og balik ang labaw sa San Marino ngadto sa sayes puntos dayon na pagkulit og daog.

Gipangulohan ni Diapera ang kadaugan pinaagi sa iyang 17 puntos, gisundan ni Dajalos nga adunay 12 ug J. Ferraren sa iyang 11 puntos.

Bugtong si Villanueva lang ang nakaiskor og double figures alang sa Gaisano-Tisa pinaagi sa iyang 18 puntos. (BANAT SPORTS)