CEBU, Philippines - Napapas ang paglaum ni Pinoy knockout artist Lorenzo Villanueva nga mahimong world champion human siya nasugamak batok sa Indonesian nga si Daud Yordan sa ilang IBO featherweight title fight niadtong miaging gabii didto sa Singapore.
Mipakita dayun sa iyang kusug si Villanueva human niya gipatumba sa first round si Yordan, apan nausik ang tanan niyang gihaguan dihang nabaslan siya sa Indonesian sa second round.
Kaduha natumba si Villanueva ug nakita nga nabangug kini og maayo gikan sa kulata ni Yordan nga maoy nakapaaghat sa Australian referee nga si Phil Austin nga ihunong ang away sa 1:06 sa second round.
Sa wala pa ang maong sakit nga kapildehan, si Villanueva giisip nga usa sa mga init nga boxing prospect sa nasud tungod sa iyang 24-0 nga record diin 23 niini nagagikan sa knockout.
“Sayang, it’s a pity,” matud pa sa manager ni Villanueva nga si Manny Piñol sa Philboxing.com. “He got too excited and wasted everything in the first round." - BANAT NEWS