Mayweather Milampos

CEBU, Philippines - Milampos  midaog pinaagi sa unanimous decision batok Cotto.

Bisan pa og tataw kaayo nga naglisud siya batok sa Puerto Rican nga si Miguel Cotto, mipatigbabaw gihapon si undefeated American Floyd Mayweather Jr. kinsa milampos pagsakmit sa WBA light middleweight title pinaagi sa unanimous decision kagahapon didto sa MGM Grand sa Las Vegas.

Gamit ang iyang talagsaong depensa ug abilidad sa counter-punching, nasakmit ni Mayweather ang ika-43 nga sunod-sunod niyang daog human siya milabaw sa score cards sa tulo ka hurado, 117-111,117-111 ug 118-110.

Hinuon bisan pa sa dakung biya sa score, nakasugat og pipila ka lisud nga sitwasyon si Mayweather human siya kapila madakpi ni Cotto kinsa mipakita sa iyang kaagresibo sa away.

Nagpabilin ang konsentrasyon sa Amerikanong boksidor ug sama sa miagi niyang mga sangka, mibanat si Mayweather sa mga naghinapos nga rounds sa away pinaagi sa pagpasud og mga hait nga hooks ug straight ngadto sa nawung ni Cotto.

"Cotto is not a push-over, he's tough, he's solid," matud pa ni Mayweather. "He came to fight, he didn’t come for survival. He came to fight. He's a tough competitor, what else can I say."

Si Mayweather mosud sa prisohan sugod sa Hunyo 1 diin siya moserbisyo sa tulo ka buwan niya nga sentinsya, apan plano niya nga moaway dayun inig gawas sa prisohan og nanghinaot siya nga si Manny Pacquiao na ang iyang ikaharung.

 “This fight, I was looking to fight Manny Pacquiao. Bob Arum continues to stand in the way, let’s see what the fans want, let’s make that fight happen,” dugang pa niya. - BANAT NEWS