Registration sa Sunsport volleyball training camp himuon karon

CEBU, Philippines - Himuon karong adlawa ang registration alang sa labing unang Sunsport Volleyball Training Camp gikan sa alas-2 sa hapon hangtod sa alas-4 sa hapon diha sa Sacred Heart Center Sports Club sa D. Jakosalem street, Cebu City.

Sa registration fee nga P1,000, ang mga entrante makaangkon og libreng Sunsport volleyball ug white t-shirt.

Niadtong buot magpakisayod kabahin sa training camp, mahimong motawag sa 345-1015, 0917-3205769 o 0922-8377712.

Ubos sa tema nga “Learning to Play Doubles: Techniques, Skills and Drills,” ang training camp bukas sa lalake ug babaye nga nagpangedaron og 18-anyos ug pataas. Ang training sessions himuon sa adlaw’ng Lunes hangtod sa Biyernes gikan sa alas-2 sa hapon hangtod sa alas-4 sa hapon.

Ang 11-ka adlaw’ng programa nga himuon sa Mayo 7-18, pagadumalaon ni Philippine beach volley coach Eric Lecain, kinsa 20 ka tuig na kapin nga ni-coach sa maong matang sa paugnat sa kusog.

Ang beach volley consultant sa Philippine Sports Commission (PSC) nakatudlo sab og mga players ug coaches gikan sa high school ngadto na sa professional level ug nakamugna og mga teams nga nidaog sa pro tour sa Estados Unidos ug Uropa.

Dugang sa iyang impresibong track record, si Lecain usa ka USAV CAPS l & ll certified coach ug official coach sa AVP ug FIVB (International Beach Volley Federation) World Tour.

Ang training camp natukod pinaagi sa mga paningkamot ni Lecain ug sa Cebu Volleyball Association (CEVA).  (BANAT SPORTS)